Joh 18 | ASO | STEP | Izesu' aza gamazi mene lo osu' lo izipahala zuhosi Zelusalemi numuno ebekuti' limi heta igi Kidiloni gi'mize nosou' nene ledi vi za zuho ma minida a'mingu' dizi minani' ve.

John 18

Zuda' Izesu'ni Biluvaliti A'ningu' Molani' Gamazi

(Mataio' 26:47-56; Maleko' 14:43-50; Luka' 22:47-53)

1 Izesu' aza gamazi mene lo osu' lo izipahala zuhosi Zelusalemi numuno ebekuti' limi heta igi Kidiloni gi'mize nosou' nene ledi vi za zuho ma minida a'mingu' dizi minani' ve. 2 Izesukisi izipahala zuhosi nene a'mingu' igi di gese' ika' ika' iga' ani' nenako biluvaliti a'ningu' molo-dive Zuda' azasi nene a'mine ebekumu' nene ha ningo gele minine' ve. 3 Ne'mine o neine' nenako nemu' nene Zuda' nene Loma veti ami linge ma do ido' eveneliti lihime'ine apaselive li O'moso guno gizi imaa' ave nabasi Halisaio' vesi mini ngimiselani' pilisi ve linge masi nene lovou' initekisi ido' lamusi livikisi davo ngele'mizo a'mine za zuhouko nene ani' ve. 4 nGele'mizo ogavo Izesu' aza ezela soto' iline' inite' mukikumu' nene mo gele mino engi' nizada ogo hetelo zahinemu' vise' i'mi nave lo longo' o-ngidine' ve. 5 Ne'mine lo longo' o-ngedavo laza Nasalete ve Izesu'ni nene vise' o'mo noune li ingine lani'. Ne'mine likevo Izesu' ti' lo lo-ngimine': A'mine ve ma nene nouve. Ido' a'mine Izesu'ni biluvaliti a'ningu' molave nene engikisi a'mida ote minine' ve. 6 Ido' Izesu' aza a'mine ve ma nene nouve nolivo analo' dalisa ave nene mehe'nidati' nene lomi limi misubolo' pou' li ingani' ve. 7 Ne'mine ikevo zahinemu' vise' i'mi nave lo gohi longo' o-ngedavo laza Nasalete ve Izesu'ni mamu' vise' o'mo noune li lani' ve. 8 Ne'mine likevo Izesu' a'mido' ti' lo line' ve: A'mine vise' i'mi nave ma nene nouve lo lo-lingimuvoni' ma ve. A'mine vise' i'mi nave ma nene nouvonaze. Lingine vekisine menesi nene a'nido' dami ha huli-ngidikevo vilizave. 9 Ne'mine lo line' nene gomu' melehinemu' nene gaza nemaine' evene' hamokisi ma vo tolovo amive lo line' gamazi ma nene gihile izelive losa nene line' ve. 10 Ne'mine lavo Simoni Petolo' ne'mo nene bainati mite' do minine' nenako a'mine nene go'veuti' gelelehe' oko eveneto' medeli mini O'moso inite' lehizi-daa' aveliti ve nabali'mi gelekele' ve belo gala zamela nene hasa' o huline' ve. A'mine gelekele' ve ne'mi gulive nene Malakusi' ve. 11 Ne'mine ogavo Izesu' aza Petolo'ni nene ti' lo lo-imine': Gaza nene me'neho geheline losa nimine' geni ekese' noso ne'mine nene geheloni' o neine' ma nene gelamabe. Gaza aka hize tile-nedamo a'mine bainati miteka nene go'veu' go'zekezo.

Izesu'ni Analo' Di Evene' Naba Anasi' Neida Gomu' Di Vani' Gamazi

12 Ne'mine lavo amisi ido' engi' guve'inesi ve naba nesi ido' Zuda veti pilisi vesi nene Izesu'ni analo' di nala' di-disa 13 a'mine kilisimasiu' nene eveneto' medeli mini O'moso inite' lehizi-daa' aveliti ve naba'ine minive Kaiaha' izemo Anasi' neida nene gomu' ele'mizi vani' ve. 14 A'mine Kaiaha' nene Zuda ve naba ga'ine do evene' mukito' medelo ve hamokovo' heleline' nene lamine' o neive live minine' ve.

Petolo' Nene Izesu' Izipahala Zuhouti' Nomuve Lo Ataize Line' Gamazi

(Mataio' 26:69-70; Maleko' 14:66-68; Luka' 22:55-57)

15 Simoni Petolo' nene Izesu' izipahala masi Izesu'ni e'meti vasine' ve. A'mine Izesu' izipahala ma neve nene eveneto' medeli mini O'moso inite' lehizi-daa' aveliti ve naba ne'mosi nene mo ninge neive minine' nenako Izesu'ni ele'mizi a'mine eveneto' medeli mini O'moso inite' lehizi-daa' aveliti ve naba'mi numuno vodo vodo ogo minavo oluso' omo' naba miningu' dizangu' nene azasi a'mingu' dizine' ve. 16 Dizine'za Petolo' nene dizamo heta gatedo' ha ote minine' ve. Nemu' nene a'mine Izesu' izipahala ma ve naba ne'mosi ninge neive minive nene lemo gatedo' gizebo ogo minine' gelekele' alu ma nene Petolo'nimu' lo-emosa ele'mizo dizine' ve. 17 Ne'mine ogavo gatedo' gizebo ogo minine' alu ne'mo nene Petolo'ni ti' lo longo' o-dine': Geikisi nene a'mine Izesu' izipahala zuhouti' nomo nolosane. Olo. Ne'mine lo longo' o-davo aza nene o'ove. Engikuti' nomuve line' ve. 18 Ido' a'mine gamenelo' nene mo hepe' noilivo gelekele' vesi ido' pilisi vesi nene olo' si'nibulo' nene ingi vite' iki lahizi minani' ve. Ne'mine igi nizavo Petolo' nesi nene a'mida ote mino lahizo minine' ve.

Eveneto' Medeli Mini O'moso Inite' Lehizi-daa' Aveliti Ve Naba'ine Ne'mo Izesu'ni Longo' O-dine' Gamazi

(Mataio' 26:59-66; Maleko' 14:55-64; Luka' 22:66-71)

19 Ido' eveneto' medeli mini O'moso inite' lehizi-daa' aveliti ve naba'ine Anasi' ne'mo Izesu'ni nene izipahala zuhomukisi ido' evene' gamazi apize ngemaa' ine' nemukisi nene longo' o-davo 20 Izesu' a'mido' ti' lo lo-imine': Naza evene' mukiliti ve'nido' nene gamazi sotokovo' laa' uvoni' ma ve. Ee, Zuda ve muki' di gese' iga' ada mono' numuno ngomo ngomoukisi mono' numuno naba' nabaukisi nene gamazi apize ngemaa' uvoni' ma ve. Ido' haleke mino gamazi ma losa'muvoni' ma ve. 21 Neni' neve nene nanitekumu' longo' noo-nedane. Gamazi noluvo gilave nete a'mine luvoni' gamazi nene gili nizani' nenaze. Engi' nene longo' o-ngedevo. 22 Ne'mine lavo a'mida pilisi ve minanguti' mali'mo nene ana gavoso golo veleu' belo ti' lo line': Gaza eveneto' medeli mini O'moso inite' lehizi-daa' aveliti ve nabamu' nene ne'mine gamazi lo-emamilinako nanimu' ne'mine lo-emane. 23 Ne'mine lavo a'mido' nene Izesu' ti' lo lo-dine': Naza gamazi goloso ma luvoni' neivo ma nene a'mine gamazi goloso ne'mi monovo nene lo soto' ozo. Ido' naza nene mo laminetokovo' noluvoni' noline' nene gaza hazamu' nanimu' nonebelane. 24 Ne'mine lavo nala' di-dikani' ha neivo Anasi' nene eveneto' medeli mini O'moso inite' lehizi-daa' aveliti ve naba Kaiaha' neida ele'mizi vilo lo a'mida ngimiseline' ve.

Petolo' Nene Izesu' Izipahala Zuhouti' Nomuve Lo Gohi Ataize Line' Gamazi

(Mataio' 26:71-75; Maleko' 14:69-72; Luka' 22:58-62)

25 Ido' Petolo' nene olo' lahizo neivo ti' li longo' i-dani': Geikisi nene a'mine ve'mi izipahala zuhouti' nomo nolosane. Olo. Ne'mine likevo aza nene a'mido' o'ove. Naza nene engikuti' nomuve lo ataize line' ve. 26 Ne'mine lavo eveneto' medeli mini O'moso inite' lehizi-daa' aveliti ve nabali'mi gelekele' ve Petolo' gala huko hulive'mi zuho minive mali'mo nene ti' lo line' ve: Gaza nene Oliva golo za zuhou' Izesulesi nizavo ninguve ma ne nane. Olo. 27 Ne'mine lavo Petolo' gohi ataize line'. Lavo a'mido' lite' lo okoloho nolo molani' ve.

Izesu'ni Pilatoda Ele'mizi Vikevo Longo' O-dine' Gamazi

28 Ne'mine ogavo Zuda ve nete nedenga' holuka' nene Kaiaha' numu'veuti' nene Izesu'ni ele'mizi Loma ve Zudaia misubou' ngamani naba lolo' o minive'mi numu'vela nene vani' ve. Ne'mine ani'za laza avotemote Aigita misubou' minani' gameneu' O'moso'mo ise'ine izingumu' gelo mino naa' noso' nite' nene aize' nalosunako heta ato' veti numungu' dizekunivo a'mine velati' inite' goloso ne'mo okodelo' dizavo ne'mo a'mine noso' nite' nalonido' lisihe' amo minalone li a'mine numungu' nene mo dizamani' ve. 29 Ne'mine igi dizami nizavo ngamani naba Pilato' nene heta lemo ogo ti' lo longo' o-ngidine': Ve meve nene nani monovo goloso ingumu' gonito' ele'mizi nave. 30 Ne'mine lavo ingine ti' li li-imani' ve: Aza nene monovo goloso daa' ive minamidiniko laza nene gei' nanida ma ele'mizo amunidine. 31 Ne'mine likevo Pilato' aza ti' lo line' ve: Langisetine nene ele'mizi vi lengi' lou' gamazitine'mo lido' e'metisa goni' i-di lihime imilo. Ne'mine lavo Zuda ve ingine ti' li lani': Ne neiha leli' lou' gamazite'mo lido' nene mo bele helelonido' lisihe' o neiha Loma ve lingine evene' lihime ngimi ngibili hilaa' nene leli' Loma vevo' ne'mine olosune li mo o'ove li-lidi nizani' ma neive li lani'. 32 A'ne'mine lani' nene Izesu' aza Loma vetevo' ngibili hilaa' ani' monovolo' e'metisa bili hililizangumu' gomu' lo soto' ine' gamazi di gihile izisa lani' ve. 33 Ne'mine likevo Pilato' nene gohi ngamani numuno nabauko dizo vo Izesu'ni vise lo-do ti' lo longo' o-dine': Gaza nene Zuda veti guve'inesi naba ma nene nabe. 34 Ne'mine lavo Izesu' a'mido' ti' lo lo-imine': Gaza ne'mine nolaine' nene gasika gakauti' gelo nolabe ido' evene' malite nene nenikumu' li-gimikevosa nolane. 35 Ne'mine lavo a'mido' nene Pilato' ti' lo lo-imine': Naza nene Zuda ve nouhe. Zuda ve nomuvoni' nenako gei' monovoka nado gelelove. Gei' zuholitesi ido' eveneto' medeli mini O'moso inite' lehizi-daa' ave naba netesi nene gonito' gele'mizi neni' nouvoda nani' nenako gaza nene nani monovo goloso ane. 36 Ne'mine lavo Izesu' ti' lo line': Guve'nesi ve nouvoni' nene me misubo'mi monovolo' do molosa guve'nesi ve minamuve. Naza me misubou' monovolo' do molo guve'nesi ve minuvodiniko neze gelekele' i-nidaa' ave ingine neni' nene Zuda veti a'ningu' vamilive li alete mili-nidi lovo di soto' adine. Ne'mine adine'za guve'nesi ve nouvoni' nene melo' monovolo' do molosa nomive. 37 Ne'mine lavo Pilato' aza ti' lo line': Ne'mine laine' nene gaza mo guvekasi ve nouve nolabe. Ne'mine lavo Izesu' ti' lo line': Gaza nenikumu' nene guvekasi ve lo gasi nene nolane. Naza nene nemu' me misubou' soto' ogo nouvoni' ve. Naza gamazi gihilemu' lo soto' soto' ogo hize ele' olosa nene me misubou' soto' ogo nouvoni' ve. Gamazi gihilelo' medeli minave muki' nene neni' gamazi'nelo' nene gili daa' nave. 38 Ne'mine lavo Pilato' aza ti' lo line': Gamazi gihile nene nado nolive. Nemu' nene gelamolosune.

Izesu'ni Bililisa Goboni Mili-di Goni' I-dani' Gamazi

(Mataio' 27:15-31; Maleko' 15:6-20; Luka' 23:13-25)

Ne'mine lo Pilato' aza gohi Zuda ve nizada heta lemo vo ti' lo lo-ngimine': Ei' nene goni' o-deloni' monovo've nene vise' ogo ningamuve. 39 Ido' neni' monovo nene ne'mino ma neine' ma neive. O'moso'mo avotingine ise'ine izingumu' gili noso' nite' naa' ani' gamenelo' gamenelo' nene lengi' muludine do lamine' o-lengedo nalato' ve hamo' kuluhize-lengedaa' nouvoni' ma neive. Nemu' nene lingine gilavo naza Zuda veti guvetinesi ve naba nene kuluhize-lengedelohe. 40 Ne'mine lavo ingine gohi geke' li ti' li lani' ve: Ve neve nene kuluhize-damo Balabasi'ni nene kuluhize-dezo. A'mine Balabasi' nene ngamani lovo o ngemaa' ive minine' ve.